TAKUKURU; WANANCHI SIMAMIENI MIRADI MSIWAACHIE VIONGOZI PEKEE.

0

 Kamanda wa Taasisi ya kuzuia na kupambana na Rushwa (TAKUKURU) Wilaya ya Makete ndg. Chilomwa Bitulo amewasihi wananchi kujitokeza kuhesabiwa tarehe 23 Agosti 2022 wakati wa zoezi la Sensa ya watu na makazi.

Bitulo amesema zoezi hilo litahusisha wananchi wote bila kujali kama mtu ana ulemavu wa viungo au changamoto ya kiakili, mtoto, mgonjwa au mzee ni lazima ahesabiwe.

Pia amewasihi wananchi Wilayani Makete kuendelea kupeana hamasa na elimu juu ya umuhimu wa zoezi hilo litakalofanyika nchi nzima bila kuacha mtu yeyote.

“Kila mwananchi anatakiwa ashiriki kwenye zoezi la Sensa ya watu na makazi, Serikali itaweza kupanga vizuri mipango yake na kuweza kutoa huduma mbalimbali kwa watu wake zikiwemo za afya, kilimo, elimu, miundombinu ya barabara n.k”.

Bitulo ameongeza kuwa iwapo mtu yeyote atamficha mtu au taarifa za mtu wakati wa zoezi hilo atakuwa hajamtendea haki mtanzania huyo na kumnyima haki zake za msingi katika nchi yake.

“Haitapendeza kama kuna mtu itatokea anaficha taarifa zozote za mtu ambaye atakuwa amelala kwenye nyumba hiyo usiku wa kuamkia siku ya Sensa ya tarehe 23 Agosti 2022, niombe wananchi wote tushiriki katika zoezi hili muhimu kwa nchi yetu”.

Sambamba kushiriki zoezi la Sensa kamanda wa Taasisi ya kuzuia na kupambana na Rushwa (TAKUKURU) Wilaya ya Makete ndg. Bitulo amewaomba wananchi kusimamia miradi ya maendeleo inayotekelezwa katika maeneo yao bila kuwaachia viongozi pekee.

Amesema ili miradi hiyo iwe na tija mwananchi anaweza kushiriki bega kwa bega na kuziba mianya ya rushwa katika hatua mbalimbali za utekelezaji wa miradi na kujenga miradi endelevu yenye manufaa kwa jamii.

“Kila mwananchi anapaswa asimamie miradi ya maendeleo inayotekelezwa kwa kutoa taarifa za viashiria vya rushwa kupitia namba 113 ili kuwe na miradi inayokidhi vigezo”.

Tags

Post a Comment

0 Comments
* Please Don't Spam Here. All the Comments are Reviewed by Admin.
Post a Comment (0)

#buttons=(Accept !) #days=(20)

Our website uses cookies to enhance your experience. Learn More
Accept !
To Top