DC NJOMBE AHAMASISHA UTALII WA KUPANDA FARASI MKOANI NJOMBE

0

Mkuu wa Wilaya ya Njombe mkoani Njombe Kissa Kasongwa amewahamasisha Watanzania waweze kutembelea wilaya hiyo ili kuona vivutio vya utalii, ambapo kuna utalii wa baridi, kupanda farasi na kuona Mto Hagafilo ambao ni kama nyoka anaetembea kwa kujikunjakunja.

Lakini pia kuna maeneo yenye nyasi fupi ambayo watu wanaweza kufanya sherehe mbalimbali ikiwemo siku ya kuzaliwa, harusi na ubarikio pembezoni mwa Mto Hagafilo.

Aliyasema hayo Julai 16, 2022 alipofika kufanya utalii wa ndani kwenye Kata ya Uwemba, ambapo alifika Parokia ya Uwemba ambayo ipo ndani ya Shirika la Mtakatifu Benedict kwa ajili ya kupanda farasi.

“Nawaalika Watanzania wote kuweza kufika Wilaya ya Njombe ambako kuna utalii wa aina nyingi ikiwemo wa baridi. Wilaya ya Njombe huwa inafikia baridi ya Nyuzi Joto tano mpaka 10, na kufanya maeneo mengine kuwa na barafu.”

“Lakini kuna maeneo mengine kama kupanda farasi waliopo Parokia ya Uwemba, Kanisa Katoliki. Farasi hawa ni kivutio kwenye wilaya yetu, hivyo watu wengi wamekuwa wakifika hapo kupanda farasi hao” alisema Kassongwa.

Kassongwa alisema, pembeni ya farasi hao, kuna mandhari nzuri ya Serikali kwenye Kata ya Uwemba, ambapo watu wanaweza kusheherekea siku yao ya kuzaliwa, harusi ama ubarikio. Kwani eneo hilo, kuna Mto Hagafilo, ambao upinda kona nyingi.

“Ukiacha farasi, kuna Ikolojia inayovutia zaidi. Kuna Mto Hagafilo ambao umepindapinda kama nyoka anaetembea. Lakini pembeni yake kuna nyasi fupi fupi ambazo ni za asili, watu wanaweza kutumia eneo hilo kufanya utalii, huku wakiwa na shughuli zao mbalimbali kama ubarikio, harusi au birthday” alisema Kassongwa.

Muongoza wageni wanaokwenda kupanda farasi, Bruda (Brother) Kizito Nsafiri kutoka Shirika la Mtakatifu Benedict, alisema anashukuru kutembelewa na Mkuu wa Wilaya Kissa Kasongwa, na kusema yeye ndiyo kiongozi wa kwanza wa Serikali kuhamasisha utalii kwenye Parokia ya Uwemba, na eneo lote la Uwemba.

“Tunamshukuru Mkuu wa Wilaya kuja kututembelea na kuhamasisha utalii kwenye eneo letu hasa huu wa kupanda farasi.

Yeye ndiyo kiongozi wa kwanza wa Serikali kupanda farasi. Tumefarijika sana kuona Mkuu wetu wa wilaya anahamasisha utalii Kata ya Uwemba.”

“Ukiacha farasi, kata yetu ya Uwemba ina maeneo mengi ya utalii ikiwemo Mto Hagafilo ambao umejikunja kama nyoka anaetembea, na una maji wakati wote, sababu juu ya mto huo kuna misitu minene, hivyo ni eneo zuri kwa kufanya utalii” alisema Bruda Kizito.

Parokia ya Uwemba ni nyumba ya Kitawa ambamo wanaishi Watawa wa Shirika la Wamisionari Wabenediktini wakiwemo Mapadre na Mabruda.Parokia ya Uwemba ilianzishwa Januari 23, 1931 na Padre Yosef Damm wa Shirika la Mtakatifu Benedict.

Na farasi waliopo hapo ni kwa ajili ya kupanda hasa wageni wanaoitembelea kama kivutio Uwemba Misheni, Pia wanauza kwa wale wanaohitaji, lakini hasa ni utalii wa ndani.

Mkuu wa Wilaya ya Njombe mkoani Njombe Kissa Kasongwa akiwa juu ya farasi yeye na binti yake Priscilla, akihamasisha wananchi kufanya utalii wa kupanda farasi. Ni baada ya yeye kwenda Kata ya Uwemba, Parokia ya Uwemba ambayo ipo ndani ya Shirika la Mtakatifu Benedict kwa ajili ya kupanda farasi. (Picha na Yusuph Mussa).
Mkuu wa Wilaya ya Njombe mkoani Njombe Kissa Kasongwa akiwa anamkuna farasi. Ni baada ya kupanda farasi huyo na kuzunguka nae takribani mita 60, akihamasisha wananchi kufanya utalii wa kupanda farasi. Ni baada ya yeye kwenda Kata ya Uwemba, Parokia ya Uwemba ambayo ipo ndani ya Shirika la Mtakatifu Benedict kwa ajili ya kupanda farasi. (Picha na Yusuph Mussa).
Mwanahabari Yusuph Mussa, aliambatana na Mkuu wa Wilaya ya Njombe mkoani Njombe Kissa Kasongwa kwenda kuangalia utalii wa kupanda farasi. Kissa amehamasisha wananchi kufanya utalii wa kupanda farasi. Ni baada ya yeye kwenda Kata ya Uwemba, Parokia ya Uwemba ambayo ipo ndani ya Shirika la Mtakatifu Benedict kwa ajili ya kupanda farasi.
Mkuu wa Wilaya ya Njombe mkoani Njombe Kissa Kasongwa (kulia) akiangalia vijana wakiota moto saa saba mchana kwenye kijiwe cha bodaboda Makao Makuu ya Kata ya Uwemba, Njombe. Kissa amewahamasisha Watanzania kwenda Wilaya ya Njombe kuona na kufanya Utalii wa Baridi Kali. (Picha na Yusuph Mussa).
Mkuu wa Wilaya ya Njombe mkoani Njombe Kissa Kasongwa (kulia) na mwanahabari Yusuph Mussa, wakiwa ndani ya Parokia ya Uwemba, ambayo ipo ndani ya Shirika la Mtakatifu Benedict. Kissa alifika hapo kwa ajili ya kupanda farasi, na kutangaza utalii kwenye Kata ya Uwemba.
Mkuu wa Wilaya ya Njombe mkoani Njombe Kissa Kasongwa akiwa pembeni ya Mto Hagafilo ambao mandhari yake yanavutia. Mto huo unapita Kata ya Uwemba, na upo karibu na Parokia ya Uwemba ambayo ipo ndani ya Shirika la Mtakatifu Benedict.
CC;MAJIRA.
Tags

Post a Comment

0 Comments
* Please Don't Spam Here. All the Comments are Reviewed by Admin.
Post a Comment (0)


#buttons=(Accept !) #days=(20)

Our website uses cookies to enhance your experience. Learn More
Accept !
To Top